Fermerlərin reytinqi hazırlanacaq -nazir açıqladı

Azərbaycanda müzakirəyə çıxarılan “Aqrar sahə haqqında” qanun layihəsində kənd təsərrüfatı məhsulları istehsalçıları üçün subsidiya, güzəştli kredit, sığorta və dövlət-özəl tərəfdaşlığı da daxil olmaqla 12 dövlət dəstəyi alətinin qanun səviyyəsində müəyyənləşdirilməsi təklif olunur.

Kənd təsərrüfatı naziri Məcnun Məmmədov Milli Məclisdə çıxışında bildirib ki, dəstək qərarlarında istehsalçıların reytinqi və Aqrar İnformasiya Sistemindəki məlumatlar əsas götürüləcək.

Reytinq istehsalçıların iqtisadi səmərəliliyini və dövlət vəsaitindən təyinatı üzrə istifadə etməsini qiymətləndirəcək.

Layihədə aqrar məhsul istehsalçılarının sahibkarlıq məqsədli fermerlər və ailə-kəndli təsərrüfatlarını əhatə edən digər istehsalçılar olmaqla iki kateqoriyaya bölünməsi nəzərdə tutulur. Sənəddə, həmçinin aqrar sahənin 47 əsas anlayışının vahid sistem şəklində qanunvericilikdə təsbit edilməsi, ilkin emalla sənaye emalı arasındakı fərqin konkret texnoloji əməliyyatlarla müəyyənləşdirilməsi təklif olunur.

Məmmədovun sözlərinə görə, dövlətin aqrar sahədəki vəzifələri layihədə 32 istiqamət üzrə müəyyənləşdirilir. Bunlara vergi intizamı və maliyyə şəffaflığının təmin edilməsi, qeyri-formal məşğulluğun azaldılması, qadınların və gənclərin aqrar fəaliyyətə cəlb olunması daxildir.

Layihə torpaqların xırdalanmasının qarşısının alınmasını, vahid əkin sahələrinin yaradılmasını, konsolidasiya və kooperasiya mexanizmlərinin tətbiqini də nəzərdə tutur. Yararlı torpaqların istifadəsiz saxlanılmasının və əkin sahələrinin yandırılmasının qarşısının alınması, eləcə də su itkilərini azaldan suvarma sistemlərinin tətbiqi ilə bağlı müddəalar da sənədə daxil edilib.

İqlim dəyişikliklərinə uyğunlaşma tədbirlərinin aqrar qanunvericilikdə ayrıca maddə ilə tənzimlənməsi də təklif olunur.

Qanun layihəsinin qəbulundan sonra “Taxıl haqqında”, “Çayçılıq haqqında”, “Pambıqçılıq haqqında” və “Kənd təsərrüfatı kooperasiyası haqqında” qanunların ləğvi nəzərdə tutulur. Həmin qanunların aktual müddəalarının yeni baza qanununa daxil ediləcəyi bildirilir.

Layihənin məqsədi aqrar sahəni ayrı-ayrı məhsullar üzrə qanunlarla deyil, sahənin subyektlərini, dövlətin vəzifələrini və dəstək mexanizmlərini vahid hüquqi çərçivədə tənzimləməkdir.

Gülnar Nazimqızı