Fermer nazirə səsləndi - bizə tez yetişən pambıq sortları lazımdır

Azərbaycanda pambıq istehsalında məhsuldarlığın artırılması üçün daha tez yetişən və məhsuldar sortların gətirilməsi təklif olunur. Bunu “Azərpambıq” ASC-nin Sabirabad filialının direktoru Əfras Əsgərov Milli Məclisdə “Aqrar sahə haqqında” qanun layihəsinin müzakirəsi zamanı deyib.

“Bizə tez yetişən, daha məhsuldar sortlar gətirilməlidir”, - Əsgərov bildirib.

O qeyd edib ki, belə sortların tətbiqi pambıqçılıqda məhsuldarlığın artırılmasına və fermerlərin gəlirlərinin yüksəldilməsinə imkan verə bilər.

Əsgərov həmçinin pambıqçı fermerlərin məhsullarını şirkətlə müqavilə bağlamadan istehsal edib sonradan emal və satışını həyata keçirə bilməsi üçün dövlət təminatlı pilot layihənin yaradılmasını təklif edib.

“Özümün də pulum var, qardaşımın da pulu var. Biz bir 7-8 hektar pambığı heç bir şirkətlə müqavilə bağlamadan əkək, bəyan edək və həm subsidiyasını alaq. Sizin təminatınızla emal zavodlarının biri ilə müqavilə bağlayaq, pambığı orada tayalaşdıraq, sonra orada emal edək, çiyidini özümüz sataq, mahlıcını gətirib öz naveslərimizin altında yerləşdirək. Bizə sərf edən qiymətə xarici alıcıya sataq”, - o deyib.

Fermerin sözlərinə görə, bu modelin işləməsi üçün dövlət təminatı vacibdir.

“Bu da ancaq sizin, dövlətin təminatı ilə olmalıdır. Mən sabah pambığı tayalaşdırdım, müqavilə bağladığım zavod məni aldada da bilər, mənim pulumu verməyə də bilər”, - o bildirib.

Filial direktoru pambıqçılıqda istifadə olunan pestisidlərin keyfiyyəti və tətbiq dozaları ilə bağlı da problem olduğunu deyib. Onun sözlərinə görə, bəzi hallarda preparatların normadan artıq istifadəsi fermerlərin xərclərini artırır və bu sahədə araşdırma aparılması üçün komissiyanın yaradılmasına ehtiyac var.

Gülnar Nazimqızı