Əlibaba Məhərrəmzadə: Bitki mühafizəsi vasitələrinə standart qoyulmalıdır

Azərbaycanda bitki mühafizəsi vasitələrinin keyfiyyətinə dair standartların müəyyənləşdirilməsi və bu məhsulların qiymətləndirilməsi üçün analitik bazanın yaradılması təklif olunur. Bunu Milli Məclisin deputatı Əlibaba Məhərrəmzadə “Aqrar sahə haqqında” qanun layihəsinin müzakirəsi zamanı deyib.

“Bu məsələdə bir neçə məqamı qeyd etmək istərdim. Onlardan biri fitosanitar məsələdir. Bitki mühafizəsi tədbirləri, keyfiyyətsiz dərmanların Azərbaycana gətirilməsi və bu məsələnin satınalma prosesi çərçivəsində qiymətləndirilməsi ilə bağlı problemlər var”, - deputat bildirib.

Məhərrəmzadə qeyd edib ki, bitki mühafizəsi vasitələrinin qiymətinin aşağı olması onların keyfiyyətli olması demək deyil.

“Bu gün qiymətin aşağı təklif olunması o demək deyil ki, biz bitki mühafizəsi problemini həll edirik. Biz müəyyən standartlar müəyyənləşdirməli və bitki mühafizəsini həmin standartlar əsasında həyata keçirməliyik”, - o deyib.

Deputatın sözlərinə görə, keyfiyyətli bitki mühafizəsi vasitələrinin istifadəsi son məhsulun əldə olunmasında mühüm rol oynayır.

“Dünyada kifayət qədər keyfiyyətli bitki mühafizəsi vasitələri var və onlar son məhsulun əldə edilməsinə ciddi təsir göstərə bilər. Həmin məhsulun yaradılması üçün də keyfiyyətli bitki mühafizəsi vasitələrindən istifadə olunmalıdır”, - Məhərrəmzadə bildirib.

O, fermerlərin də son illərdə bu sahədə problemlərin olduğunu bildirdiyini qeyd edib.

“Demək olar ki, bir məhsulun istehsalına hər sahə üzrə vəsait ayrılır. Suya, dərmana, işçi qüvvəsinə, əməyə və digər istiqamətlərə xərc çəkilir. Lakin bitki mühafizəsi vasitələri keyfiyyətsiz olduqda sonda həmin bitki tənəzzülə uğrayır”, - deputat deyib.

Məhərrəmzadə hesab edir ki, bu sahədə vahid standartlar müəyyənləşdirilməli və bitki mühafizəsi vasitələrinin qiymətləndirilməsi üçün analitik baza yaradılmalıdır.

“Bu, çox önəmli məsələdir. Bunu müəyyən qaydada formalaşdırıb standarta çevirmək lazımdır. Bununla yanaşı, Kənd Təsərrüfatı Nazirliyinin və ya fitosanitar fəaliyyətlə məşğul olan qurumların analitik bazası olmalıdır. Həmin baza bu məsələləri ciddi şəkildə qiymətləndirməlidir”, - o bildirib.

Gülnar Nazimqızı