Hicran Hüseynova: Bəzi şəxslərə pulsuz hüquqi və vəkil xidməti göstəriləcək

Əlilliyi olan və işləməyən şəxslər, şəhid ailələrinin üzvləri, müharibə veteranları, işsizlər, insan alverinin və məişət zorakılığının qurbanları, eləcə də maddi vəziyyəti çətin olan şəxslərin dövlət hesabına pulsuz hüquqi və vəkil xidmətlərindən yararlanması nəzərdə tutulur.

Bunu Milli Məclisin Ailə, qadın və uşaq məsələləri komitəsinin sədri Hicran Hüseynova parlamentdə “Pulsuz hüquqi yardım haqqında” qanun layihəsinin müzakirəsi zamanı deyib.

Onun sözlərinə görə, qanun layihəsi pulsuz hüquqi yardıma ehtiyacı olan şəxslərin hüquq bərabərliyinin təmin edilməsinə və bu sahədə vahid hüquqi mexanizmin formalaşdırılmasına yönəlib.

Hüseynova bildirib ki, dövlət hesabına pulsuz hüquqi və vəkil xidmətlərindən 18 yaşınadək əlilliyi müəyyən edilmiş şəxslər, ünvanlı dövlət sosial yardımı alan ailələrin üzvləri, valideynini itirmiş və ya valideyn himayəsindən məhrum olmuş uşaqlar da istifadə edə biləcəklər.

“Pulsuz hüquqi yardıma ehtiyacı olan bütün şəxslərin hüquq bərabərliyinin təmin edilməsi əsas məsələlərdən biridir. Qanun layihəsinin digər vacib tərəfi isə pulsuz hüquqi yardımın göstərilməsi üzrə vahid hüquqi mexanizmin formalaşdırılmasıdır”, - komitə sədri bildirib.

O qeyd edib ki, maddi vəziyyəti çətin olan və gəlirləri yaşayış minimumundan aşağı səviyyədə olan digər şəxslərin də qanunvericiliklə müəyyən edilmiş qaydada pulsuz hüquqi yardımdan yararlanması mümkün olacaq.

Hüseynovanın sözlərinə görə, pulsuz hüquqi yardım göstərən vəkillərin xidmət haqları və digər zəruri xərclər dövlət büdcəsinin vəsaiti, o cümlədən Vəkillər Kollegiyasına ayrılan vəsaitlər hesabına ödəniləcək.

“Bir sözlə, bu qanun layihəsi hər kəsin yüksək keyfiyyətli hüquqi yardım almaq hüququnu təmin edir”, - o deyib.

Gülnar Nazimqızı