9 ayda velosipedçilərin vurulması ilə nəticələnən 16 qəza baş verib

Azərbaycanda 2026-cı ilin ilk doqquz ayında velosipedçilərin vurulması ilə nəticələnən 16 yol-nəqliyyat hadisəsi qeydə alınıb. Hadisələr nəticəsində 9 nəfər ölüb, 8 nəfər xəsarət alıb. Bu barədə Baş Dövlət Yol Polisi İdarəsi (BDYPİ) məlumat yayıb.

BDYPİ xüsusilə respublika əhəmiyyətli avtomobil yollarının kənarındakı yaşayış məntəqələrində velosipedlə hərəkət edən şəxsləri ehtiyatlı olmağa çağırıb.

Qaranlıqda və məhdud görünmə şəraitində lazımi təhlükəsizlik tədbirləri görülmədən, eləcə də texniki cəhətdən nasaz velosipedlə yüksək sürətli yollara çıxmağın qəza riskini artırdığı vurğulanıb.

Qanunvericiliyə əsasən, velosipedlərin avtomagistrallarda hərəkəti qadağandır. Velosipedçilər xüsusi velosiped zolağı ilə, belə zolaq olmadıqda isə yolun hərəkət hissəsinin kənarı və ya yol çiyini ilə hərəkət etməlidirlər. Velosiped texniki cəhətdən saz və lazımi avadanlıqla təchiz olunmalı, idarəetməyə mane olan yük və ya sərnişin daşınmamalıdır.

BDYPİ velosipedçiləri və digər ikitəkərli nəqliyyat vasitələrinin sürücülərini qaydalara ciddi əməl etməyə, özlərinin və digər hərəkət iştirakçılarının həyatını təhlükəyə atmamağa çağırıb.

Gülnar Nazimqızı