Ötən il istehsalat qəzalarında ölənlərin sayı açıqlanıb

Azərbaycanda 2025-ci ildə istehsalat qəzaları nəticəsində zərərçəkənlərin sayı informasiya və rabitə sahəsində 16 nəfərdən 23 nəfərə, emal sənayesində isə 110 nəfərdən 119 nəfərə yüksəlib. Bu barədə Dövlət Statistika Komitəsindən bildirilib. 

Ötən il ölkə üzrə istehsalat qəzaları nəticəsində əmək qabiliyyətini itirən və ya ölənlərin ümumi sayı 680 nəfər olub. Bu, 2024-cü illə müqayisədə 67 nəfər və ya 9% azdır.

2025-ci ildə istehsalat qəzalarında zərərçəkənlərin sayı ən çox emal sənayesində - 119 nəfər, tikintidə isə 118 nəfər olub. Nəqliyyat və anbar təsərrüfatında bu göstərici 56 nəfər təşkil edib.

Tikintidə zərərçəkənlərin sayı 2024-cü ildəki 159 nəfərdən 118 nəfərə, nəqliyyat və anbar təsərrüfatında 77 nəfərdən 56 nəfərə, mədənçıxarma sənayesində isə 66 nəfərdən 15 nəfərə düşüb.

Elektrik enerjisi, qaz və buxar istehsalı, bölüşdürülməsi və təchizatı sahəsində zərərçəkənlərin sayı 23 nəfərdən 20 nəfərə, su təchizatı və tullantıların təmizlənməsi sahəsində isə 10 nəfərdən 4 nəfərə azalıb.

Gülnar Nazimqızı