XİN: Bakıda AQEM-in VII Zirvə Görüşü regional əməkdaşlıq üçün mühüm mərhələdir

Bakıda Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) VII Zirvə Görüşünün başa çatması Asiyada regional dialoqun, qarşılıqlı etimadın və əməkdaşlığın inkişafında mühüm mərhələdir.Bu barədə Azərbaycan Xarici İşlər Nazirliyinin (XİN) "X" sosial şəbəkə hesabında paylaşım edilib.

XİN zirvə görüşünün əsas nəticələrini açıqlayıb. Bunlara Bakı Bəyannaməsinin və əməkdaşlıq, sağlamlıq və əməyin təhlükəsizliyi üzrə bəyanatın qəbul edilməsi, Laos Xalq Demokratik Respublikasının AQEM-ə tamhüquqlu üzv qəbul olunması, Azərbaycanın sədrliyinin 2026–2028-ci illərədək uzadılması və səfir Sultan Hacıyevin 2026–2030-cu illər üçün AQEM-in baş katibi təyin edilməsi daxildir.

Həmçinin Kambocanın müvafiq konvensiyanı ratifikasiya etməsi ilə AQEM Katibliyinin İmtiyaz və İmmunitetləri haqqında Konvensiyanın qüvvəyə minməsi prosesi tamamlanıb.

Nazirlik qeyd edib ki, zirvə görüşü Asiyada çoxtərəfliliyə, qarşılıqlı əlaqələrə, sülhə və təhlükəsizliyə sadiqliyi bir daha təsdiqləyib.

"Azərbaycan daha dinc və firavan Asiyaya doğru dialoq, etimad quruculuğu və birgə fəaliyyət platforması kimi AQEM-in gücləndirilməsinə sadiq qalır", – paylaşımda bildirilib.