Fələstin AQEM üzvlərini BMT qətnamələrinin icrasına çağırıb

Fələstin BMT Təhlükəsizlik Şurasının qətnamələrinin icrası, Fələstin xalqının hüquqlarının bərpası və torpaqlarının qaytarılması üçün AQEM üzvlərini konkret addımlar atmağa çağırıb. Bunu Fələstinin xarici işlər naziri Varsen Aqabekyan Şahin AQEM-in sammitində çıxışı zamanı deyib.

Nazir Qəzza zolağında humanitar vəziyyətin ağır olduğunu, humanitar yardımların çatdırılmasına və bərpa işlərinə maneələr yaradıldığını bildirib. O, Şərqi Qüdsdə gərginliyin artdığını, qanunsuz məskunlaşma fəaliyyətlərinin və hücumların davam etdiyini deyib.

Aqabekyan Şahin davamlı sülhün işğal və legitim hüquqların pozulması üzərində qurula bilməyəcəyini bildirib. Onun sözlərinə görə, həll 4 iyun 1967-ci il sərhədləri daxilində, paytaxtı Şərqi Qüds olan müstəqil Fələstin dövlətinin yaradılmasını və fələstinlilərin öz yurdlarına qayıtmasını nəzərdə tutmalıdır.

O, AQEM-in üzv dövlətlərini təşkilatın prinsiplərini real addımlara çevirməyə və münaqişələrin beynəlxalq hüquqa uyğun, sülh yolu ilə həllinə dəstək verməyə çağırıb.

Gülnar Nazimqızı