Orxan Nəzərli: ətin qiyməti ilə bağlı risk görmürük

Aqrar sektorda gəlir və mənfəət vergisi ödəyiciləri üçün vergi dərəcəsi 20%-dən 2%-ə endirilib. Bunu Dövlət Vergi Xidmətinin rəisi Orxan Nəzərli bildirib.

Onun sözlərinə görə, güzəştlər əsasən uçot aparan və Elektron Kənd Təsərrüfatı İnformasiya Sistemində (EKTİS) qeydiyyatda olan təsərrüfat subyektlərinə şamil edilir.

“Ət qiymətlərində bahalaşma ilə bağlı aqrar sektora toxundum. Orada idxalda ƏDV güzəşti veriləcək. Hansısa xüsusi risk görmürük. Ən çox müzakirə olunan, qaldırılan məsələ aqrar sektorla bağlı olduğu üçün onunla başlamaq istərdim”, – Nəzərli deyib.

O qeyd edib ki, aqrar sahədə gəlir və mənfəət vergisi rejimində fəaliyyət göstərən ödəyicilər 20% əvəzinə 2% vergi ödəyəcəklər. Bu, vergi yükünün 90% azaldılması deməkdir.

Nəzərlinin sözlərinə görə, gəlir və mənfəət vergisi ödəyicisi olmayan, sadələşdirilmiş vergi rejimində fəaliyyət göstərən təsərrüfat subyektləri üçün də müəyyən şərtlərlə güzəştlər nəzərdə tutulur. Bu şərtlər əsasən EKTİS-də qeydiyyat və uçotun aparılması ilə bağlıdır.

“Uçot o baxımdan təşviq edilməlidir ki, güzəştlər məhz uçotda olan, fəaliyyətini rəsmiləşdirən subyektlərə veriləcək”, – o bildirib.