DYP bayram günlərində sürücülərə müraciət edib

Baş Dövlət Yol Polisi İdarəsi 8 Noyabr – Zəfər Günü və 9 Noyabr – Dövlət Bayrağı Günü ilə əlaqədar qeyri-iş günlərində yollarda hərəkət intensivliyinin artacağını gözləyir və sürücüləri yol hərəkəti qaydalarına ciddi əməl etməyə çağırır.

İdarədən verilən məlumata görə, sürücülərə səfərdən əvvəl avtomobillərinin texniki sazlığını, xüsusilə əyləc sistemini, işıq cihazlarını və təkərləri yoxlamaq tövsiyə olunur.

DYP sürücüləri sürəti yol və hava şəraitinə uyğun seçməyə, müəyyən edilmiş həddi aşmamağa, təhlükəli ötmə və manevrlərdən çəkinməyə, ara məsafəsini qorumağa çağırıb.

Müraciətdə təhlükəsizlik kəmərindən istifadə, sükan arxasında mobil telefonla diqqəti yayındırmamaq, uzun səfərlər zamanı yorğun və yuxusuz halda avtomobil idarə etməmək tövsiyə edilib.

İdarə piyadalara da müraciət edərək yolu yalnız müəyyən olunmuş yerlərdən keçməyi, xüsusilə qaranlıq vaxtlarda və məhdud görünmə şəraitində diqqətli olmağı tövsiyə edib.