Azərbaycanda dələduzluqda ittiham olunan şəxs Almaniyadan ekstradisiya edilib

Mənzilləri təmir etdirmək adı ilə vətəndaşlara qarşı dələduzluqda ittiham olunan Elmir Nuriyev Almaniyadan Azərbaycana ekstradisiya edilib.

Bu barədə Ədliyyə Nazirliyi məlumat yayıb.

Bildirilib ki, İnterpolun Azərbaycandakı Milli Mərkəzi Bürosu tərəfindən beynəlxalq axtarışa verilən Elmir Elxan oğlu Nuriyevin yeri Almaniyada müəyyən edilib və o, həbs olunub. Noyabrın 6-da onun Azərbaycana ekstradisiyası həyata keçirilib.

Məlumata görə, Elmir Nuriyev 2021-ci ildə tamah niyyəti ilə etibardan sui-istifadə və aldatma yolu ilə zərərçəkmiş şəxslərə məxsus mənzilləri təmir etdirəcəyi barədə həqiqətə uyğun olmayan məlumatlar verməkdə, bununla da xeyli miqdarda ziyan vurmaqda ittiham olunur.

Ona qarşı Cinayət Məcəlləsinin 178.2.2 və 178.4-cü maddələri ilə ittiham irəli sürülüb.

Ədliyyə Nazirliyinin məlumatına görə, Baş Prokurorluğun sorğusu, nazirliyin təqdim etdiyi müvafiq zəmanətlər və aparılan danışıqlardan sonra Nuriyevin Azərbaycana ekstradisiyasına razılıq əldə edilib.

O, Ədliyyə Nazirliyinin Beynəlxalq əməkdaşlıq baş idarəsinin və Penitensiar xidmətinin əməkdaşları tərəfindən Azərbaycana gətirilib. Məhkəmənin həbs qərarına əsasən, müvafiq istintaq təcridxanasına yerləşdirilib.