Turizm fəaliyyəti ilə məşğul olan sahibkarlar üçün 5 illik vergi güzəşti təklif edilir

Azərbaycanda hotel və sanatoriya fəaliyyəti ilə məşğul olan fərdi sahibkarların gəlirlərinin, hüquqi şəxslərin isə mənfəətinin 50%-dək hissəsinin 2027-ci il yanvarın 1-dən beş il müddətinə vergidən azad edilməsi təklif olunur.

Güzəşt Azərbaycan Respublikasına turist kimi gələn əcnəbilərə və vətəndaşlığı olmayan şəxslərə göstərilən xidmətlərdən əldə edilən gəlirlərə şamil ediləcək. Azadolmanın həcmi həmin xidmətlər üzrə dövriyyənin ümumi dövriyyədəki xüsusi çəkisinə uyğun müəyyənləşdiriləcək, lakin 50%-dən çox olmayacaq.

Təklifin əsaslandırılmasında qeyd olunur ki, vergi güzəşti turizm axınının artırılması, xidmət ixracının stimullaşdırılması, regionlarda məşğulluğun genişləndirilməsi və ölkəyə valyuta daxilolmalarının artırılması məqsədi daşıyır.

Bildirilib ki, turizm sektorunun inkişafı qeyri-neft iqtisadiyyatının şaxələndirilməsi baxımından strateji prioritetlərdəndir. Xarici turistlərə göstərilən xidmətlər üzrə vergi güzəştlərinin investisiyaların cəlb olunmasına və xidmət keyfiyyətinin yüksəldilməsinə töhfə verəcəyi gözlənilir.

Əsaslandırmada beynəlxalq konsaltinq şirkəti Oliver Wyman-ın da turizm sektorunun rəqabət qabiliyyətinin artırılması üçün fiskal stimulları, xüsusilə xarici turistlərə göstərilən xidmətlər üzrə vergi güzəştlərini tövsiyə etdiyi qeyd olunur.