Gözəllik xidmətlərinə nağd ödənişlər üzrə 8% vergi təklif edilir

Azərbaycanda gözəllik xidmətləri göstərən şəxslər üçün nağd dövriyyəyə 8%, nağdsız dövriyyəyə isə 6% sadələşdirilmiş vergi dərəcəsinin 5 il müddətinə tətbiqi təklif olunur. Eyni zamanda, ƏDV ödəyicisi olan bu sahənin subyektlərinin POS-terminal vasitəsilə əldə etdiyi nağdsız dövriyyənin 50%-nin ƏDV tutulan ümumi dövriyyədən çıxılması nəzərdə tutulur.

Təklifin əsas məqsədi gözəllik xidmətləri sektorunda nağdsız ödənişləri təşviq etmək, dövriyyənin şəffaflığını artırmaq və qeyri-rəsmi məşğulluğun qarşısını almaqdır.

Əsaslandırmada qeyd olunur ki, gözəllik xidmətləri sektoru əsasən kiçik və fərdi sahibkarlıq subyektlərindən ibarətdir. Bu sahədə nağd dövriyyənin yüksək payı və qeyri-rəsmi məşğulluq riski vergi uçotunun şəffaflaşdırılmasını zəruri edir.

Diferensial vergi dərəcələrinin tətbiqinin sahibkarları nağdsız əməliyyatlara üstünlük verməyə və real dövriyyələrini bəyan etməyə təşviq edəcəyi bildirilir. ƏDV ödəyiciləri üçün POS-terminal vasitəsilə aparılan ödənişlər üzrə dövriyyənin 50%-nin ƏDV tutulan ümumi dövriyyədən çıxılması mexanizminin də nağdsız ödənişləri stimullaşdıracağı qeyd olunur.

2026-cı il yanvarın 1-dən gözəllik xidmətləri sektorunda göstərilən xidmətlərə də ƏDV-nin geri qaytarılması mexanizmi tətbiq edilir.