Taksi sürücülərinin gəlirlərinə 1 faiz sadələşdirilmiş vergi tətbiqi təklif olunur

Azərbaycanda taksi sifarişi operatorları vasitəsilə sərnişindaşıma fəaliyyəti göstərən vergi ödəyicilərinin operatorlar tərəfindən ödənilən gəlirlərindən 1% dərəcə ilə sadələşdirilmiş vergi tutulması təklif olunur.

Təklifə əsasən, vergitutma obyekti nəqliyyat vasitəsi deyil, sürücünün əldə etdiyi gəlir olacaq. Vergi taksi sifarişi operatorları tərəfindən sürücülərə ödənilən məbləğ əsasında hesablanacaq.

Təklifin əsaslandırılmasında bildirilir ki, hazırda taksi fəaliyyəti üzrə sadələşdirilmiş vergi regionlar üzrə müəyyən edilmiş sabit məbləğlər əsasında, nəqliyyat vasitəsi vergitutma obyekti götürülməklə ödənilir.

Qeyd olunur ki, mövcud sistem fəaliyyətin faktiki həcmini və sürücünün gəlirini nəzərə almır. Nəticədə taksi fəaliyyəti ilə tam iş günü məşğul olan sürücülərlə əlavə gəlir əldə etmək üçün məhdud müddətdə çalışan şəxslər eyni məbləğdə vergi ödəyirlər.

Yeni mexanizmin gəlirlərə uyğun vergitutmanı təmin edəcəyi, sürücülərin inzibati yükünü azaldacağı, nağdsız ödənişləri təşviq edərək şəffaflığı artıracağı və kölgə iqtisadiyyatının məhdudlaşdırılmasına kömək edəcəyi bildirilir.