Deputat kuryerlər üçün 1%-lik vergi rejiminin tətbiqini təklif edir

Deputat Azər Badamov kuryer fəaliyyəti ilə məşğul olan şəxslər üçün nəzərdə tutulan 15 manatlıq sadələşdirilmiş verginin gəlirlərin 1%-i həcmində müəyyən edilməsini təklif edib.

O, həmçinin müstəqil fəaliyyət göstərən taksi sürücülərinin vergi öhdəliklərinin necə müəyyənləşdiriləcəyinə aydınlıq gətirilməsini istəyib.

“Operatorlarla əməkdaşlıq edən taksi sürücülərinin gəlirlərindən onlara ödənilən məbləğin 1%-nin vergiyə cəlb olunması çox düzgün, ədalətli yanaşmadır. Amma burada bir sual meydana gəlir: bütün taksi sürücüləri operatorlarla fəaliyyət göstərmir. Müstəqil fəaliyyət göstərən taksi sürücülərinin vergi öhdəliyi necə müəyyən olunacaq?” – deputat bildirib.

Azər Badamov kuryerlər üçün də taksi sürücülərində olduğu kimi 1%-lik vergi rejiminin tətbiqini təklif edib.

“Kuryer fəaliyyəti ilə məşğul olan şəxslərə 15 manat sadələşdirilmiş vergi müəyyən olunur. Yaxşı olardı ki, kuryer fəaliyyəti ilə məşğul olan şəxslər də taksi fəaliyyəti ilə məşğul olan şəxslər kimi 1%-lik vergi rejiminə cəlb olunsunlar. Çünki kuryer fəaliyyəti göstərən şəxslərin də hamısının eyni gəlirləri olmur və onlar bu fəaliyyətlə davamlı şəkildə məşğul olmurlar”.

Deputatın sözlərinə görə, kuryerlərin fəaliyyəti rəqəmsal platformalar üzərindən həyata keçirildiyindən onların iş rejiminə və gəlirlərinə həmin platformalar vasitəsilə nəzarət etmək daha rahatdır.

Yeni vergi məcəlləsinə görə kuryerlər hər ay 15 manat vergi ödəyəcək.