Türkiyə AQEM-in beynəlxalq təşkilata çevrilməsini dəstəkləyir

Türkiyə Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) tamhüquqlu beynəlxalq təşkilata çevrilməsini dəstəkləyir. Bunu Türkiyənin xarici işlər naziri Hakan Fidan AQEM-in Bakıda keçirilən sammitində çıxışı zamanı deyib.

Fidan bildirib ki, Türkiyə AQEM-i Asiyanın ən əhatəli təhlükəsizlik forumu kimi gücləndirmək niyyətindədir. Onun sözlərinə görə, təşkilatın dialoqu səmərəli əməkdaşlığa çevirməkdə mühüm rolu olmalıdır.

Nazir Asiyada nəqliyyat əlaqələrinin genişləndirilməsinin və enerji marşrutlarının şaxələndirilməsinin iqtisadi təhlükəsizliyi artıracağını deyib. O, Transxəzər Şərq-Qərb Orta Dəhlizinin və Türkiyə ilə İraq üzərindən Körfəzi Avropa ilə birləşdirməsi nəzərdə tutulan “İnkişaf Yolu” layihəsinin əhəmiyyətini vurğulayıb.

Fidan AQEM, Türk Dövlətləri Təşkilatı, ASEAN və Şanxay Əməkdaşlıq Təşkilatı arasında koordinasiyanın gücləndirilməsinə, həmçinin elm, texnologiya və innovasiya sahələrində əməkdaşlığın dərinləşdirilməsinə çağırıb. O, süni intellektin qarşıdurma və inhisarçılığın deyil, inklüziv əməkdaşlığın əsası olmalı olduğunu bildirib.

Nazir İsrailin Fələstin xalqının hüquqlarını pozduğunu deyərək, AQEM üzvlərini Fələstinin hüquqlarını dəstəkləməyə çağırıb. Fidanın sözlərinə görə, davamlı həll 1967-ci il sərhədləri əsasında, paytaxtı Şərqi Qüds olan müstəqil və suveren Fələstin dövlətinin yaradılmasını tələb edir.

Gülnar Nazimqızı