Tramp Ukraynada "Starlink"in zəifləməsində iştirakını inkar edib

ABŞ Prezidenti Donald Tramp Ukraynada “Starlink” peyk internet xidmətinin hərbi versiyası olan “Starshield” sisteminin işinin məhdudlaşdırılmasında iştirakını təkzib edib.

Tramp bu barədə Ağ Evin Cənub çəmənliyində jurnalistlərlə söhbətində bildirib.

“Bilmirəm, bunu kim edə bilərdi, çünki bunu edən mən deyildim. Düşünmürəm ki, bunu İlon (Mask) edib. Anladığım qədərilə, hər şey əvvəlki kimi qalır”, – o deyib.

“Reuters” agentliyi oktyabrın 15-də mənbələrə istinadən Ağ Evin Ukrayna hərbçilərinin istifadə etdiyi “Starshield” xidmətinə məhdudiyyət qoyulması barədə göstəriş verdiyini yazıb.

Məlumata görə, məhdudiyyətlər Ukrayna ordusunun bölmələri ilə qərargahları arasında rabitədə fasilələrə və internet sürətinin azalmasına səbəb olub, hərbi əməliyyatlara maneə yaradıb.

“SpaceX” şirkətinin rəhbəri İlon Mask daha əvvəl “X” sosial şəbəkəsində “Starshield” sisteminin ABŞ hökumətinə məxsus olduğunu və onun sürətinə və ya istifadəsinə dair məhdudiyyətlərin ABŞ hərbçiləri və prezident tərəfindən müəyyən edildiyini bildirib.