Məcnun Məmmədov: Azad edilmiş ərazilərdə 230 hektar istixana sahəsi yaradılacaq

Azad edilmiş ərazilərdə sənaye üsulu ilə istixana layihəsinin həyata keçirilməsi nəzərdə tutulur. Artıq layihə üçün ayrılması planlaşdırılan 230 hektar əraziyə sahibkarlar tərəfindən investisiya marağı göstərilib. Bunu kənd təsərrüfatı naziri Məcnun Məmmədov bildirib.

Onun sözlərinə görə, bölgələrdə keçirilən müşavirələrdən sonra fermer və sahibkarlar tərəfindən müxtəlif istiqamətlər üzrə investisiya layihələri təqdim olunub. Hazırda həmin layihələrin reallaşdırılması və planlaşdırılması istiqamətində işlər aparılır.

Nazir qeyd edib ki, Prezidentin çağırışından sonra heyvandarlıq, bağçılıq və istixana təsərrüfatları sahələrində fermer və sahibkarların investisiya marağı əhəmiyyətli dərəcədə artıb.

Məmmədovun sözlərinə görə, 230 hektarlıq istixana layihəsi bu marağın konkret nümunələrindən biridir. Əraziyə investisiya yatırılması ilə bağlı sahibkarların marağı yüksəkdir və layihənin daha da genişləndirilməsi nəzərdə tutulur.

Nazir müasir suvarma sistemlərinin tətbiqi istiqamətində də müsbət dinamikanın olduğunu vurğulayıb.

O bildirib ki, 2025-ci ilin sonlarında ölkədə müasir suvarma sistemləri ilə təmin olunan sahələrin həcmi 130 min hektar olduğu halda, hazırda bu göstərici 150-155 min hektarı ötüb.

Məmmədov qeyd edib ki, bir il ərzində müasir suvarma sistemlərinin əhatə etdiyi ərazilərin 20-25 min hektar genişlənməsi ümidverici göstəricidir.

Aytac