Deputat hakimlərin telefon zənglərinə cavab verməməsindən şikayətlənib

Milli Məclisin deputatı Hikmət Babaoğlu pulsuz hüquqi yardım haqqında qanun layihəsinin müzakirəsi zamanı hakimlərin deputatların zənglərinə cavab verməməsi, məhkəmə işlərinin başqa rayonlarda araşdırılması, eləcə də Vəkillər Kollegiyasına daxil olan şikayətlərin artması ilə bağlı narazılığını ifadə edib.

Deputat çıxışında bildirib ki, bəzi hakimlər deputatların onlara zəng etməsini məhkəmə hakimiyyətinə müdaxilə kimi qiymətləndirə bilər.

Bununla belə, onun sözlərinə görə, bəzi hallarda hakimlər şikayətçilərin yanında olduqları üçün deputatlara zəng etdiklərini əsas gətirirlər.

O, başqa rayonlarda baş vermiş hadisələrlə bağlı işlərin digər rayonların məhkəmələrində araşdırılması hallarının da aydınlaşdırılmasını istəyib.

Deputat bildirib ki, bəzi hallarda hakimlərin işin öz rayonlarında araşdırılması ilə bağlı əvvəlcədən razılaşdıqları barədə məlumatlar əldə edir və bunun hansı əsasla baş verdiyini anlamır.

Çıxışında Vəkillər Kollegiyasının fəaliyyətinə də toxunan deputat quruma daxil olan şikayətlərin sayının artmasına baxmayaraq, inzibati tədbirlərin sayının azaldığını vurğulayıb.

Onun təqdim etdiyi statistikaya görə, 2024-cü ildə Kollegiyaya 1 116, 2025-ci ildə isə 1 506 şikayət daxil olub. Həmin dövrdə inzibati tədbirlərin sayı 185-dən 162-yə düşüb.

Deputat vəkillərin regionlar üzrə qeyri-bərabər bölgüsünü də problem kimi qiymətləndirib. O bildirib ki, ölkədə fəaliyyət göstərən vəkillərin 81 faizi Bakıda çalışır.

Onun fikrincə, hüquqi xidmətlərin regionlarda əlçatanlığını artırmaq üçün vəkillərin bölgələrdə təmsilçiliyinə xüsusi diqqət yetirilməlidir.

Gülnar Nazimqızı