Aİ Ukraynaya 2027-ci il üçün 45 milyard avro ayırıb

Avropa Komissiyası 2027-ci il üçün Ukraynaya 45 milyard avro məbləğində maliyyə ayrılmasını təsdiqləyib.Bu barədə Avropa Komissiyası məlumat yayıb.

Bildirilib ki, Komissiya Aİ Şurasının Ukraynaya veriləcək kreditin 2027-ci il üçün nəzərdə tutulan 45 milyard avroluq qalan hissəsinin təsdiqlənməsi ilə bağlı təklifini qəbul edib.

Kiyev 2027-ci il üçün Avropa İttifaqından 70 milyard avro tələb edib. Avropa Komissiyasının açıqlamasına görə, ayrılacaq vəsaitin 13,3 milyard avrosu Aİ büdcəsindən maliyyələşməyə, 31,7 milyard avrosu isə silah alışına yönəldiləcək.

Komissiya əlavə maliyyə mənbələrinin axtarışını davam etdirəcəyini bildirsə də, bu vəsaitin hansı mənbələr hesabına təmin olunacağını açıqlamayıb.

Avropa Komissiyası vəsaiti kredit kimi təqdim etsə də, məbləğ faktiki olaraq Ukraynaya əvəzsiz veriləcək. Kredit üzrə faizlər isə Avropa İttifaqının büdcəsi hesabına ödəniləcək.