“Avropa çempionatına 1 ölkə ev sahibliyi etməlidi” – UEFA prezidenti

 

Apasport.az saytının məlumatına görə, bu sözləri UEFA-nın yeni prezidenti Aleksander Çeferin deyib.

 

O, xarici mətbuata açıqlamasında qarşıya qoyulan tapşırıqlardan danışıb. Çeferin Bakı da daxil olmaqla, ayrı-ayrı ölkələrin şəhərlərində keçiriləcək Avro-2020-ni misal gətirərək, gələcəkdə bu formatı tətbiq etməyəcəklərini bildirib: "Yaxşı ideyadı, amma düşünmürəm ki, biz gələcəkdə bu formatdan istifadə edək.  Avropa çempionatı başqa cür keçirilməlidi. Ev sahibi 1 ölkə olmalıdı. 13 və daha artıq ölkədə Avropa çempionatı keçirməklə irəliyə addımlamaq olmaz”.

Çeferin istənilən vəzifədə 1 şəxsin uzun müddət qalmasını doğru hesab etmir: "Bununla bağlı limit tətbiq etməyi planlaşdırıram. Bir şəxsin 20 il eyni vəzifəni icra etməsini düzgün saymıram. İcraiyyə Komitəsində ancaq aktiv fəaliyyəti olan şəxslər yer almalıdılar. Planlarımın sırasında qadın futbolunu inkişaf etdirmək də var. Bir də antidopinq qaydalarını gücləndirmək lazımdı. UEFA daim inkişafa ehtiyacı olan, möhtəşəm təşkilatdı. Müəyyən vaxtdan bir nəsə dəyişiklik etmək lazımdı. Bu o demək deyil ki, indi işlər qaydasında getmir. Dəyişikliklər gözləyənlərə söz verirəm ki, islahatlara başlayacağıq. Mənə insanların yaşı önəmli deyil. 75-80 yaşlı şəxs 40 yaşındakı insandan ağıllı ola bilər. Mənim üçün əsas məsələ limitdi. Hamı anlamalıdı ki, Çeferin UEFA-nın prezidenti vəzifəsində 20 il qalmağı düşünmür. Müəyyən müddət işlədikdən sonra getməlisən”.