Azərbaycan futbolu Avropada tarixinin ən uğurlu həftəsini yaşadı

Azərbaycan futbolu Avropa klublar turnirlərində indiyədək ən uğurlu həftəsini geridə qoyub. Dörd klubdan üçü qalib gəlib, heç biri məğlub olmayıb.

Çempionlar Liqasının II təsnifat mərhələsində “Qarabağ” səfərdə İrlandiyanın “Shelbourne” klubunu 3:0 hesabı ilə məğlub edib.

Konfrans Liqasında “Zirə” doğma meydanda Xorvatiyanın “Hajduk” klubu ilə 1:1 bərabərə qalıb. Turnirin debütantı “Araz-Naxçıvan” Bakıda Yunanıstanın “Aris” komandasını 2:1 hesabı ilə məğlub edib. “Sabah” isə Kişinyovda Moldova təmsilçisi “Petrocub”u 2:0 hesabı ilə üstələyib.

Bu nəticələrlə Azərbaycan klubları UEFA reytinqi üçün 3,5 xal (və ya ölkə üzrə 0,875 əmsal) toplayıb. Bu, 2022/23 mövsümündən bəri ən yüksək göstəricidir.

Hazırda Azərbaycan UEFA reytinqində 18,125 xalla 29-cu yerdədir və gələn həftə Avrokuboklardan kənarlaşdırılmış Rusiya (18,299 xal) ilə yerini dəyişə bilər. Növbəti hədəf 27-ci yerdə olan Ukrayna (18,475) olacaq.

N.Təbrizli