Ronaldinyo Rivaldonun yoluyla gedir

"Barselona"nın sabiq ulduz futbolçusu Ronaldinyo Rivaldonu təqib edərək Afrika klubuna keçə bilər.

ANN.Az goal.com-a istinadən xəbər verir ki, "Kabuscorp" klubunun baş məşqçisi Benedikt Kangamba Ronaldinyonun Liga mövsümü sona çatdıqdan sonra Anqolaya gələcəyini iddia edib.

34 yaşındakı futbolçu sentyabr ayında sürpriz bir qərarla Meksikanın "Queretaro" komandası ilə 2015-2016-ci il mövsümünün sonuna qədər müqavilə imzalamışdı.

Kangamba televiziyada çıxışı zamanı bildirib:  "Ronaldinyo ilə danışıqlarımız davam edir. Ancaq bu müqavilənin reallaşması üçün əvvəlcə klubu ilə olan müqaviləsini ləğv etməlidir. Daha sonra bizim komandaya gələ bilər. Niyə Ronaldinyonu istədiyimi soruşa bilərsiniz... Çünki mən komandamda keyfiyyət istəyirəm".

Xatırladaq ki, 2012-ci ildə Rivaldo da Kabuscorp ilə bir illik müqavilə bağlamışdı.