"Qrupu 3 xalla tamamlamaq istəyirik"

ANN.Az-ın AFFA-nın saytına istinadən yaydığı xəbərə görə, bu sözləri 19 yaşadək futbolçulardan ibarət millimizin baş məşqçisi Nikolay Adam Avropa çempionatının elit-raund mərhələsində İngiltərəyə 0:1 hesabı ilə uduzduqları matçdan sonra deyib.

Təcrübəli mütəxəssis qrupun son oyununda qələbə qazanmaq istədiklərini bildirib: "Fikrimcə, ölkəmizi burada yaxşı təmsil edirik. Kollektiv olaraq düzgün seçim edib, yaxşı futbolçuları yığmaya dəvət etmişik. Uşaqlar həm öyrənməyi bacarırlar, həm də bunu istəyirlər. Bu uşaqlarla işləmək mənə rahatdır. Çünki onlar bizi dinləyib, tapşırıqlarımızı meydanda həyata keçirirlər.

 

Məqsədimiz odur ki, qarşıdakı iki gündə bərpa prosesi keçib uşaqların hansı vəziyyətdə olduğunu müəyyənləşdirək. Zədəli futbolçularımız var, eyni zamanda iki sarı vərəqəsi olan İlyas Səfərzadə növbəti oyunda cəzalıdır. Əlbəttə, qrupu 3 xalla tamamlamaq istəyirik. Bunu daha çox uşaqlar istəyir. Onların bu istəkdə olmaları məni sevindirir".

Qeyd edək ki, yığmamız qrupda son matçını martın 31-də Danimarkaya qarşı keçirəcək.