Aİ mühacir axınını dayandırmaq üçün Türkiyədən kömək gözləyir

Cümə axşamı Brüsseldə Avropa İttifaqının Avropaya mühacir axını ilə bağlı problemlərə həsr olunmuş sammiti keçiriləcək. Avropa liderləri xüsusən Türkiyə ilə əməkdaşlığa diqqət yetirəcəklər.

Aİ Türkiyə ilə sammit ərəfəsində razılığa gəlməyə ümid edirdi, lakin ötən şənbə günü Ankarada partlayışlardan sonra üçgünlük matəm elan olunduğuna görə danışıqlar təxirə salınıb.

Bu il artıq 600 min mühacir dənizlə Aİ ölkələrinə çatıb. Onların əksəriyyəti, Beynəlxalq Miqrasiya Təşkilatının (IOM) məlumatına görə, Avropaya Türkiyə üzərindən keçir.

Türkiyənin özündə hazırda, əsasən müharibə içində olan Suriyadan, 2 milyona yaxın mühacir olduğu güman edilir.

Avropa İttifaqı Türkiyəyə aşağıda nəzərdə tutulan tədbirləri həyata keçirmək üçün müştərək plan təklif edir:

    Mühacirlərlə bağlı məsələlərdə Aİ-nin Türkiyəyə maliyyə və maddi-texniki yardımını artırmaq.
    Avropa gəmilərinə Türkiyə sahillərində keşik çəkmək icazəsini vermək.
    Mühacirlərin qeyri-leqal nəql edilməsi ilə məşğul olanlarla mübarizə.
    Qeyri-leqal mühacirlərin vətənə qayıtması ilə bağlı işləri asanlaşdırmaq.

Brüssel Ankara tərəfindən yeni sığınacaq təqdim etmə üsulları tətbiq ediləcəyinə nail olmaq, eləcə də Aİ-nin maliyyə iştirakı ilə 6 qaçqın qəbul etmə mərkəzlərinin hazırlanmasının tezləşdirilməsini istəyir.

Həmçinin gözlənilir ki, Avropa İttifaqı ilə daha sıx əməkdaşlıq müqabilində Türkiyə Şengen zonasına baş çəkmək istəyən vətəndaşları üçün vizaların ləğv olunmasına çalışacaq.
Qarşılıqlı güzəştlər

Sammit ərəfəsində Avropa Şurasının prezidenti Donald Tusk xəbərdar edib ki, Brüsselin yalnız Türkiyə hakimiyyəti Avropaya mühacir axınının azalmasına kömək etmək üçün tədbirlər görməyə razı olduğu halda güzəştə gedər.

Aİ üzvü 29 ölkə liderlərinə ünvanlanan məktubda Donald Tusk qeyd edir ki, sammitin məqsədi "Avropaya qaçqın axınını azaltmaqdır. Türkiyə ilə razılaşmanın mahiyyəti nəticədə qaçqın sayının əhəmiyyətli dərəcədə azalmasındadır”.

Donald Tusk diqqəti bölgədə daha mürəkkəb şəraitin yaranmasına cəlb edir: "Türkiyə bizi Suriyanın şimalında təhlükəsizlik zonası yaratmaq ideyasını dəstəkləməyə çağırır, bir halda ki, get-gedə Suriya münaqişəsində daha fəal iştirak edən Rusiya uçuşdan azad zona elan edilməsinə qarşı açıq çıxış edir”.

BBC müxbirinin Brüsseldən verdiyi məlumata görə, "Avropa liderlərinin əksəriyyəti o qənaətə gəlib ki, Türkiyə ilə daha sıx əməkdaşlıq olmadan mühacir axınının qabağını almaq səyləri əbəs olar”.

"Lakin Türkiyə cavab güzəştlər – maliyyə yardımının artırılması, viza rejiminin liberallaşdırılması və, nəhayət, onun Avropa İttifaqına daxil olmaq ərizəsinin ciddi surətdə nəzərdən keçirilməsini – gözləyir”, - müxbirimiz izah edir. //bbc.com/azeri
www.ann.az