Merkel Türkiyəyə niyə gəlir?

  

Politoloq Qabil Hüseynli Angela Merkelin səfəri və müzakirə olunacaq məsələlər barədə Modern.az saytına şərh verib.  

O qeyd edib ki, bu səfər zamanı Almaniya kansleri bir çox məsələləri müzakirəyə çıxardacaq və  əsas diqqət Suriya qaçqınları məsələsinə yönəldiləcək.  

"Bu gün Suriya qaçqınları Avropa üçün çox böyük təhlükə törətməkdədir. 2 milyon 400 mindən çox qaçqın Avropaya gedib. Onun təxminən 1milyon 200 min nəfəri Almaniyaya gedib. Artıq demək olar ki, Almaniyanın qaçqın qəbul etməyə gücü yetmir.

Türkiyədə də 2 milyon 400 min nəfər Suriya qaçqını məskunlaşıb və daha 2 milyon nəfərin də gəlməsi gözlənilir. Yəni, Rusiya Suriyaya basqın etdikdən sonra qaçqınların sayı daha da artıb.

Ümumiyyətlə, Suriyanın 10 milyona yaxın insanı ya qaçqın vəziyyətində, ya da öz ölkələrində köçkün vəziyyətində yaşayır”.  

Ekspertin sözlərinə görə, bu baxımdan da Merkelin məqsədi Suriyadan çıxıb Avropaya üz tutan insanların öz ərazilərindəcə saxlanılmasının yolunu tapmaqdır.

Bunun üçün də gərək Avropa onların maliyyə xərclərini öz üzərinə götürsün.   Politoloq bu təklifin əslində məqsədəuyğun olduğunu qeyd edib:  

"Düşünürəm ki, bu, o qədər də pis təklif deyil. Çünki Suriyada vəziyyət düzəldikdən sonra qaçqınların vətənə qayıtması asan olacaq, üstəlik də Avropa əgər qaçqınlara yardım edərsə, onlar indikindən daha yaxşı yaşaya bilər. Çünki bu zaman onların maliyyə təminatı, uşaqların məktəbə getməyi, tibbi xidmət məsələləri və s. kimi məsələlər maliyyə vəsaiti hesabına yenidən qurula bilər”.  

Qabil Hüseynli əlavə edib ki, liderlərin görüşü zamanı Türkiyədəki terror aktlarının genişlənməsi və "İslam dövləti” (İŞİD) məsələsi xüsusilə diqqətdə olacaq.