Almaniya: Holokosta biz cavabdehik

Almaniya Holokostun törədilməsinə görə məsuliyyətin ona aid olmasında israr edib.

Açıqlama, İsrailin baş nazirinin Fələstin liderinin nasistləri Avropa yəhudilərini öldürməyə təkrik etməsini iddia etməsindən sonra gəlir.

Kansler Angela Merkel deyib ki, almanlar "yaxşı bilir" ki, nasistlər cavabdehdir.

Berlində xanım Merkellə birgə çıxış edən İsrail Baş Naziri Benjamin Netanyahu deyib ki, "heç kimdə şübhə olmamalıdır ki, Holokostu Hitler törədib".

Hərçənd o, çərşənbə axşamı Qüdsdə (Yerusəlimdə) keçirilən Dünya Sionist Konqresindəki çıxışında deyib ki, Adolf Hitler sadəcə yəhudiləri Avropadan çıxarmaq istəyib, lakin Qüdsün müftisi Hacı Amin əl-Hüseyni ona deyib: "Onları yandır”.

Bundan sonra cənab Netanyahu çoxsaylı tənqidlərə məruz qalıb.

Lakin İsrailin Holokost memorialındakı baş tarixçi bildirib ki, bu yanlış faktdır.

İsrailin müxalifət lideri baş nazirin dediklərini "təhlükəli tarixi təhrif” adlandırıb.

Fələstinin yüksək rütbəli rəsmisi bildirib ki, cənab Netanyahu fələstinlilərə o qədər nifrət bəsləyir ki, Hitleri belə bağışlamağa hazırdır.

İki tərəf arasında gərginlik bu ilin oktyabrın əvvəllərindən, ardıcıl bıçaq və silahlı hücumların ardından daha da artıb. Bunlardan əksəriyyəti fələstinlilərin israillilərə ölümcül hücümü olub, yalnız bir halda israilli bıçaqla fələstinliyə hücum edib.

İsrail təhlükəsizlik qüvvələri də qiyamçı fələstinlilərlə toqquşub, nəticədə fələstinlilər arasında ölənlər olub.
Hitlerlə görüş

1974-cü ildə həyatını itirmiş Hüseyni Fələstinin millətçi lideri olub və 1920 və 1930-cü illərdə, o zamankı Britaniya mandatlı Fələstində yəhudilərə və Britaniya rəsmilərinə qarşı zorakı kampaniyalar həyata keçirib.

O, 1937-ci ildə ərazini tərk edib, lakin Britaniyanın ərazini yəhudi və ərəb dövlətlərinə bölmə planlarına qarşı çıxışını davam etdirib və İkinci Dünya Müharibəsi zamanı nasistlərlə müttəfiq olub.

Hüseyni 1941-ci ilin noyabr ayında Berlində Hitlerlə görüşüb və nasistlərin liderindən ərəb dövlətinin yaradılmasına dəstək istəyib, həmin dövrə aid alman mətbuatı bildirir.

Lakin çərşənbə axşamı Qüdsdə keçirilmiş Dünya Sionistləri Konqresində çıxış edən cənab Netanyahu fərqli məlumat verib.

"Hitler həmin vaxt yəhudiləri qırmaq istəməyib – o sadəcə yəhudiləri köçürmək istəyib,” İsrail baş naziri bildirib.

"Və Hacı Amin əl-Hüseyni Hitlerlə görüşüb və deyib: Əgər onları köçürsən, hamısı bura gələcək”.

"Bəs onlarla nə edək? Hitler soruşub. Hüseyni deyib: Onları yandır”.

Qüdsdəki Holokost memorialının baş tarixçisi professor Dina Porat isə bildirib ki, cənab Netanyahunun bəyanatı faktiki səhvdir.

"Hitlerə yəhudiləri yandırmaq ideyasının müfti tərəfindən verildiyini demək doğru deyil,” o Yedioth Ahronoth qəzetinə bildirib.

Hüseyni müharibə cinayətlərinə görə axtarılıb, lakin heç vaxt Nürnberq məhkəməsinə çıxmayıb.//bbc.com/azeri