Rusiyanın valyuta ehtiyatları gələn il tükənə bilər

"Report" TASS agentliyinə istinadən xəbər verir ki, nazirin sözlərinə görə, 2015-ci ildə ehtiyatların təxminən yarısı - 2,6 trln. rubl (40 mlrd. dollar) xərclənib: "Deməli, 2016-cı ildə biz ehtiyatlarımızı eyni tempdə xərcləsək, bu, ehtiyatlarımızın tükənməsinə gətirib çıxaracaq".

Nazir qeyd edib ki, neftin cari qiymətləri və rublun bugünkü məzənnəsi 2016-cı ilin büdcəsində 900 mlrd. rubl (15 mlrd.dollar) kəsir yarada bilər. 

A.Siluanov 2015-ci ilin sonuna Ehtiyat Fondunun həcminin 3,4 trln. rubl (53 mlrd. dollar) təşkil edəcəyini bildirib. Onun sözlərinə görə, bu vəsait 2016-cı ildə büdcə kəsirinin maliyyələşdirilməsinə yönəldiləcək: "Milli Rifah Fondunun vəsaitləri isə ilin sonuna dəyişməyərək 4,9 trln. rubla (76 mlrd. dollar) bərabər olacaq".

TASS agentliyinə verdiyi müsahibədə maliyyə nazirinin müavini Tatyana Nesterenko neftin qiymətinin bu səviyyədə qalacağı təqdirdə bütün ehtiyat fondlarının 2017-2018-ci illərdə tükənə biləcəyini qeyd edib. Nazir müavini daha sonra qeyd edib ki, yüksək büdcə kəsiri və onun maliyyələşdirilməsində yaranan amillər yaxın iki ildə ehtiyat fondlarının kəskin azalmasına, hətta bitməsinə gətirib çıxara bilər: 

"Biz yüksək neft qiymətləri zamanı əldə etdiyimiz gəlirləri xərcləməklə məşğuluq. Daxili bazarda vəsait qıtlığı və büdcə kəsirinin örtülməsi üçün xərclənən son pullar bizə investisiya layihələrini həyata keçirməyə imkan vermir". 

Qeyd edək ki, by bəyanatlar "Ural" markalı neftin 44 dollar/barel səviyyəsində qalmaq şərti nəzərə alınmaqla verilib. Bir neçə gün öncə isə Rusiya Mərkəzi Bankı neftin qiymətinin 2016-cı ildə 40 dollar/bareldən aşağı enə biləcəyini vurğulayıb.