Sankt-Peterburq: aviaqəzada ölənlərdən doqquzunun kimliyi müəyyənləşib

Rusiyanın Sankt-Peterburq şəhərində, Misirdə qəzaya uğramış Kogalymavia şirkətinə məxsus təyyarədə ölənlərdən 9 nəfərin cəsədi yaxınları tərəfindən tanınıb.

Hadisə ilə bağlı yaradılan Operativ Qərargahın nümayəndələrinə əsasən, ölənlərin tanınması üzrə tədbirlər bir neçə həftə çəkə bilər.

Hazırda cənazələrin nə vaxt veriləcəyi bilinmir və buna görə də dəfn mərasimlərinin nə zaman keçiriləcəyini demək mümkün deyil, BBC Rus Xidmətinin müxbiri Pavel Aksyonov xəbər verir.

Sinay yarımadasında ötən şənbə baş vermiş təyyarə qəzasında həlak olanlardan 144 nəfərinin cənazəsi Qahirədən Sankt-Peterburqa bazar ertəsi və çərşənbə axşamı gətirilib.

Hadisə yerində axtarış işlərilə bağlı əməliyyat davam etdirilir.

Operativ Qərargahda bildirirlər ki, ölənlərin qohumlarına kompensasiyalar cümə axşamından etibarən verilməyə başlanılacaq.

Kogalymavia şirkətinə məxsus Airbus A321 təyyarəsi şənbə günü Şarm əl-Şeyxdən Sankt-Peterburqa yollanarkən Sinay yarımadası üzərində qəzaya uğrayıb. Göyərtədə olan 224 adam həlak olub.

Qəzanın səbəbləri araşdırılır. Hazırda təyyarənin havada parçalandığı məlumdur. Buna təyyarə hissələri və cənazələrin böyük əraziyə səpələnməsi dəlalət edir.

Aviaşirkətin rəhbərliyi bildirir ki, bu, "xarici qüvvənin mexaniki təsiri” nəticəsində baş verə bilərdi. Hərçənd ki, hava nəqliyyatına nəzarət edən Rosaviasiya dövlət qurumu belə bir nəticəyə gəlməyin erkən olduğunu hesab edir.

Amerikanın kəşfiyyat-təhlil üzrə Stratfor araşdırma mərkəzi hesab edir ki, qəzaya səbəb böyük bir ehtimalla təyyarədəki partlayış olub. "Partlayıcı göyərtədəki intiharçının üzərində və ya təyyarənin yük bölməsində ola bilərdi", araşdırmada deyilir.

Bu arada Rusiya, Fransa və Misir mütəxəssislərindən ibarət beynəlxalq komissiya üzvləri qəza yerində tapılan "qara qutu"nun yazılarını təhlil etməyə başlayıblar. //bbc.com/azeri/

www.ann.az