“Charlie Hebdo” A321 təyyarəsinin qurbanlarını ələ saldı – FOTO

Karikaturalardan birində "İslam dövləti” (İŞİD) terror qruplaşmasının başını iki əli ilə tutan yaraqlısı təsvir edilib, onun başına səmadakı təyyarənin qalıqları tökülür.

Karikaturanın altındakı şərhdə: "İŞİD: Rusiya aviasiyası bombardmanları gücləndirir” yazılıb.

İkinci karikaturada qəzaya uğramış təyyarənin fonunda gözündə günəş eynəyi olan kəllə təsvir edilib.

"Rusiya loukosterinin təhlükəsi. Air Cocaine reysi ilə uçmalıydım”, - şəklə yazılan rəydə Dominikan respublikasında göyərtəsində 600 kq kokain tapılan fransız təyyarəsi ilə əlaqədar qalmaqala işarə edilir.  

Jurnal aviaqəza qurbanlarına dair ilk dəfə deyil ki, belə "zarafat” edir. Belə ki, yayda Malayziya təyyarəsinin Hindistan dənizində ilk qalıqları tapıldıqdan sonra "Charlie Hebdo” rəssamları itkin düşmüş Boeingin stüardessa və pilotunun təsvir olunduğu karikatura dərc etmişdilər.

Sentyabrda jurnal əməkdaşları yenidən tənqid atəşinə tutuldular. Çoxları həlak olmuş 3 yaşlı suriyalı oğlanın karikaturasının mənəviyyatdan kənar olduğunu hesab edirdi.

Xatırladaq ki, yanvar ayında jurnalda Məhəmməd peyğəmbərin karikaturası dərc olunduqdan sonra Fransada "Charlie Hebdo” redaksiyasına silahlı hücum olmuşdu. İki cinayətkar redaksiyaya girərək insanlara atəş açmışdılar. Nəticədə 12 nəfər həlak olmuşdu, onların arasında iki polis əməkdaşı da var idi.

Hücum edənlər hadisə yerindən qaçmışdılar. Sonradan saxlanılan zaman onlar öldürülmüşdülər.