Ruslar pomidorun bir dənəsini 6 türk lirəsinə yeyirlər

Türkiyədən pomidor alışını dayandıran Rusiyada  bu məhsulu artıq dənə ilə yeməyə başlayıblar. Modern.az-ın xarici mediaya istinadən verdiyi xəbərə görə, qiymətlər insanları çıldırdacaq şəkildə artıb. Dünən Rusiyadakı bir marketdən çəkilən fotoda pomidorun dənəsi 145 rubla, yəni təxminən 6 türk lirəsinə satılıb.

Kremlin Türkiyəyə tətbiq ediyi iqtisadi sanksiyalar səbəbindən bir çox meyvə, tərəvəz və ət məhsulunun Rusiyaya gətirilməsi 2016-cı il yanvarın 1-dən tamamilə qadağan ediləcək.

Türkiyənin hava məkanını pozan Rusiyanın hərbi təyyarəsinin vurulmasının ardından, Rusiyanın Türkiyəyə tətbiq etdiyi sanksiyaların əksəriyyəti meyvə və tərəvəz məhsullarını əhatə edir.

Bu səbəbdən indi Rusiyada pomidorun kilosu 560 rubla, yəni 23,5 türk lirəsinə olub. Marketlərdən dənə ilə pomidor almağa başlayan ruslar iqtisadi baxımdan çətin günlər yaşayır. Türkiyə Rusiyaya 2015-ci ilin 10 ayında təxminən 300 min ton pomidor, 255 min ton sitrus meyvələri, 20 min ton ağ ət və 36 min ton duz ixrac etmişdi.