Tramp TikTok ilə bağlı qərar verib

ABŞ prezidenti Donald Tramp ölkədə TikTok xidmətinin fəaliyyətinin uzadılması barədə qərar verib. Bu barədə o, Truth Social sosial şəbəkəsində bildirib.

"Mən TikTok-un daha 75 gün açıq qalması üçün sərəncam imzalayıram",-Tramp qeyd edib.

Ağ Ev rəhbəri bildirib ki, onun administrasiyası “TikTok-u xilas etmək üçün sövdələşmə üzərində çox çalışıb” və “böyük irəliləyiş” əldə edib.

Tramp, xidmətin uzadılması qərarının bütün "təsdiqlərin" imzalanmasını təmin etmək üçün lazım olduğunu söylədi.

“Biz bu razılaşmanın reallaşması üçün TikTok və Çin ilə işləməyi səbirsizliklə gözləyirik”, – ABŞ prezidenti əlavə edib.

Yanvarın 19-da ABŞ-da ByteDance-dən TikTok-un Amerika seqmentini satmağı tələb edən qanun qüvvəyə minib. Çin şirkəti şərtləri yerinə yetirməsə, Vaşinqton milli təhlükəsizlik səbəbi ilə bu sosial şəbəkədən istifadəyə qadağa qoyacaq.