Rusiyada əsirlikdə olan jurnalistin daxili orqanları çıxarılıb

Rusiyada əsirlikdə həlak olan ukraynalı jurnalist Viktoriya Roşçinanın meyiti Ukraynaya çoxsaylı işgəncə izləri və bir neçə daxili orqanı çatışmayan vəziyyətdə qaytarılıb. Bu barədə Vacib Hekayələr nəşri istintaqa yaxın mənbəyə istinadla məlumat yayıb.

Ekspertizanın nəticələrinə görə, Roşçinanın göz alması, beyni və qırtlağının bir hissəsi çıxarılıb. Həmçinin dilaltı sümük qırılıb. Məhkəmə-tibbi eksperti bunun boğulma və digər zorakılıq izlərini gizlətmək cəhdi ola biləcəyini bildirib.

“Qırtlağın meyitə baxış zamanı çıxarılması qeyri-adi haldır. Boğulma zamanı tez-tez dilaltı sümük qırılır, gözlərdə qansızma, beyində oksigen çatışmazlığı əlamətləri görünə bilər,” –  ekspert qeyd edib.

Ukrayna Baş Prokurorluğunun nümayəndəsi Yuriy Belousov bildirib ki, jurnalistin bədənində həmçinin sıyrıqlar, qançırlar, qabırğa sınığı, boyun nahiyəsində zədələr və ayaqlarda elektrik şoku izləri aşkarlanıb. Ölüm səbəbi hələ də dəqiqləşməyib.

Ukrayna hüquq-mühafizə orqanlarının məlumatına görə, Rusiya dəfələrlə əsir meyitlərini orqanları çıxarılmış şəkildə qaytarıb. Bu, bəzən tibbi prosedur kimi izah olunur, lakin zorakılıq izlərini gizlətmək cəhdi də ola bilər.

Ukrayna tərəfi Roşçinanın meyitinin təhvil verilməsi barədə 24 aprel tarixində məlumat versə də, meyit əslində fevral ayında alınıb. Vinnitsa morquna “NM SPAS 757” (naməlum kişi, ürək arteriyalarında zədə) yazısı ilə bədən torbasında daxil olub. Etiketdə isə “7390 Roşçina V.V.” qeyd olunub.

Roşçina 2023-cü ilin avqustunda işğal olunmuş ərazilərdə reportaj hazırlayarkən itkin düşmüşdü. Rusiya onun əsir olduğunu yalnız 2024-cü ilin mayında etiraf etmişdi. Sentyabrda isə onun ölüm xəbəri yayılıb.

N.Təbrizli