Zelenski Putinlə üz-üzə gəlmək üçün İstanbula gedir

Rusiya 30 günlük atəşkəs təklifini rədd etsə də Ukrayna Prezidenti Volodimir Zelenski mayın 15-də, məsinə sülh danışıqlarında iştirak etmək  üçün  İstanbula yolanacaq.  Bu barədə Axios nəşri mənbəyə istinadla xəbər verir.

Zelenski əvvəlcə bildirmişdi ki, cümə axşamı Türkiyədə şəxsən prezident Vladimir Putini gözləyəcək.

“Sabahdan etibarən tam və davamlı atəşkəsə ehtiyac var. Qətlləri uzatmağın mənası yoxdur. Ümid edirəm ki, ruslar bu dəfə bəhanə axtarmayacaq”, – o sosial şəbəkədə yazıb.

Kreml danışıqlar baş tutacağı halda Rusiya nümayəndə heyətinin rəhbərinin adını açıqlayacağını bildirib. Prezident Vladimir Putin isə Moskvada əvvəlki atəşkəslərin Ukrayna tərəfindən pozulduğunu deyərək, şərtsiz danışıqlara hazır olduqlarını bəyan edib.

Dünya liderləri, o cümlədən Donald Tramp görüş təşəbbüsünü dəstəkləyib, lakin Avropa və ABŞ rəsmiləri atəşkəsin dərhal qüvvəyə minməli olduğunu vurğulayıblar. Onlar Rusiya razılıq vermədiyi təqdirdə yeni sanksiyaların tətbiq ediləcəyini bildiriblər.

Türkiyənin hakim Ədalət və İnkişaf Partiyası İstanbulun neytral diplomatik mərkəz kimi rolunu bir daha təsdiqləyib.

Partiya sözçüsü Ömər Çəlik bildirib ki, Türkiyə etibarlı vasitəçi olaraq qalır, prezident Rəcəb Tayyib Ərdoğan isə sülh təşəbbüslərində əsas fiqurdur.

N.Təbrizli