Aİ “Azadlıq Radiosu” üçün 5,5 milyon avro ayırıb

Avropa İttifaqı (Aİ) “Azadlıq Radiosu”nun fəaliyyətini dəstəkləmək məqsədilə 5,5 milyon avro ayırıb. Bu barədə Aİ-nin diplomatik rəhbəri Kaya Kallas xarici işlər nazirlərinin görüşündən sonra keçirilən mətbuat konfransında bildirib.

“Nazirlər “Azadlıq Radiosu” üçün maliyyə ayırmaq barədə razılığa gəldilər”, — Kallas deyib.

Onun sözlərinə görə, bu vəsait Aİ-nin qonşuluq ölkələrində, o cümlədən Şimali Qafqaz və Mərkəzi Asiyada radiostansiyanın yayım fəaliyyətini davam etdirməsi məqsədi daşıyır.

Kallas əlavə edib ki, bu qərar qısamüddətli maliyyələşdirməni əhatə edir və Aİ ölkələri gələcəkdə uzunmüddətli dəstək mexanizmini razılaşdırmalıdırlar.

Martın 14-də ABŞ prezidenti Donald Tramp “Azadlıq Radiosu” və “Amerikanın səsi”nin daxil olduğu ABŞ Qlobal Media Agentliyinin fəaliyyətini məhdudlaşdırmaq üçün sərəncam imzalayıb.

N.Təbrizli