Avropanın 14 ölkəsi Rusiyaya qarşı bəyanat hazırlayıb

Avropanın 14 ölkəsinin xarici işlər nazirləri və hökumət nümayəndələri Rusiyanın “kölgə donanması” adlandırılan donanmasına birgə yanaşmanın hazırlanması barədə razılığa gəliblər. Bu barədə Belçika, Böyük Britaniya, Danimarka, Almaniya, İslandiya, Latviya, Litva, Hollandiya, Norveç, Polşa, Fransa, Finlandiya, İsveç və Estoniya nümayəndələrinin görüşündən sonra Böyük Britaniya Xarici İşlər Nazirliyinin yaydığı bəyanatda deyilir.

"Bu gün biz əməkdaşlığımızı daha da gücləndirmək və Rusiyanın "kölgə donanması"na qarşı mübarizədə milli orqanlarımızın birgə və əlaqələndirilmiş yanaşmasını təmin etmək barədə razılığa gəldik. Biz dənizdə məsuliyyətli davranışı təşviq etmək, beynəlxalq normalara riayət olunmasını gücləndirmək və dəniz fəaliyyətinin şəffaflığını təmin etmək üçün beynəlxalq hüquq normalarına uyğun olaraq ümumi tövsiyələr hazırlamaq niyyətindəyik", - məlumatda deyilir.

Avropanın 14 ölkəsinin nümayəndələri “dövlət mənsubiyyəti olmayan” gəmilərin Baltik və ya Şimal dənizindən etibarlı bayraq qaldırmadan üzməsi halında “beynəlxalq hüquq çərçivəsində müvafiq tədbirlər görəcəklərini” vəd ediblər.

Bundan əvvəl Böyük Britaniya hakimiyyəti Rusiyanın enerji ehtiyatlarının nəqlində iştirak etdiyi iddia edilən 300-ə yaxın tankeri sanksiyalar siyahısına əlavə edib. Onların hamısına saxlanılma təhlükəsi altında Böyük Britaniya limanlarına daxil olmaq qadağan edilib.

Gülnar