İran müharibədən sonra da nüvə proqramından imtina etməyəcək – XİN

İran İsraillə 12 günlük müharibədən sonra da nüvə proqramından imtina etməyi planlaşdırmır. Bu barədə İranın xarici işlər naziri Abbas Əraqçi "Al Araby Al Jadeed" nəşrinə müsahibəsində bildirib.

Əraqçinin sözlərinə görə, Tehran nüvə texnologiyalarına böyük sərmayə qoyub və bu proqramdan geri çəkilmək niyyətində deyil.

"Alimlərimizi itirmişik, xalqımız sanksiyalara tab gətirib, bizə müharibə qəbul etdirilib. Heç kim bu proqramdan imtina etməyəcək", –  o vurğulayıb.

Nazir əlavə edib ki, İranın nüvə obyektlərinə qarşı hücumun “ciddi və dərin nəticələri” olacaq.

Əraqçi həmçinin qeyd edib ki, Tehran Nüvə Silahlarının Yayılmaması Haqqında Müqaviləyə (NPT) sadiq qalıb, lakin MAQATE-nin hesabatları siyasi xarakter daşıyır və real vəziyyəti əks etdirmir.

N.Təbrizli