Ərdoğan İraqın baş naziri ilə PKK-nın tərksilah edilməsini müzakirə edib

Türkiyə prezidenti Rəcəb Tayyib Ərdoğanla İraqın baş naziri Məhəmməd Şia əl-Sudani arasında telefon danışığı olub.Bu barədə Türkiyə liderinin ofisi məlumat yayıb.

Söhbət zamanı tərəflər Kürdüstan Fəhlə Partiyasının (PKK) yaraqlılarının tərksilah edilməsi prosesinin başlanması, həmçinin ikitərəfli əməkdaşlıq məsələləri və regional gündəliyi müzakirə ediblər.

Ərdoğan "Terrorsuz Türkiyə" prosesinin həssas və ardıcıl şəkildə həyata keçirildiyini və Ankaranın bölgəni terror təhlükəsindən birdəfəlik təmizləməyə sadiq olduğunu qeyd edərək,Türkiyənin bu prosesi pozmağa çalışanlara qarşı qətiyyətlə mübarizəni davam etdirəcəyini bildirib.

PKK-nın tərksilah edilməsi prosesi cümə günü səhər İraqın şimalındakı Süleymaniyyə şəhərində başlayıb. Türkiyə hakimiyyəti ümid edir ki, “Terrorsuz Türkiyə” təşəbbüsünün həyata keçirilməsi kürd yaraqlıları ilə uzun müddətdir davam edən silahlı münaqişəyə son qoymağa kömək edəcək.

Silahsızlaşdırma Türkiyə Milli Kəşfiyyat Təşkilatının (MİT) və ölkənin silahlı qüvvələrinin nəzarəti altında həyata keçiriləcək. Bütün prosesin üç-dörd ay ərzində başa çatdırılması gözlənilir. Bütün mərhələlər müvafiq strukturlar tərəfindən qeydə alınacaq.