Rusiyanın bir neçə bölgəsində dron təhlükəsi elan edilib

Gecə saatlarında Rusiyanın cənubundakı bir neçə bölgədə pilotsuz uçuş aparatlarının (PUA) hücumu ilə bağlı partlayış səsləri eşidilib və hava hücumu təhlükəsi elan olunub. Bunu yerli rəsmilər və media bildirir.

Rusiya Teleqram kanallarına əsasən, Rostov vilayətinin Taganroq və Novoçerkassk şəhərləri ətrafında azı yeddi partlayış qeydə alınıb. Partlayışların hava hücumundan müdafiə sistemləri tərəfindən dronlara qarşı həyata keçirildiyi ehtimal olunur.

Taganroq, Şaxtı və Novoçerkassk sakinləri səma üzərində partlayış işıqları və dronların səsini müşahidə etdiklərini bildiriblər.

Stavropol diyarı, Voronej, Lipetsk və Astraxan vilayətlərində dron hücumu təhlükəsi ilə bağlı xəbərdarlıqlar verilib. Lipetsk vilayətində hava təhlükəsi rejimi tətbiq olunub.

Şimali Osetiyada da dron təhlükəsi elan olunub, region rəhbəri Sergey Menyaylo mobil internetin sürətində yavaşlama ola biləcəyi barədə xəbərdarlıq edib.

Rusiya mediasına görə, bu arada Krım körpüsündə avtomobil nəqliyyatı üçün hərəkət müvəqqəti dayandırılıb.

N.Təbrizli