Xameneyi Trampın İranla bağlı bəyanatlarını ələ salıb

İranın ali lideri ayətullah Əli Xameneyi ABŞ prezidenti Donald Trampı “boş sözlər” səsləndirməkdə ittiham edib.

Onun sözlərinə görə, Tramp İsraildəki çıxışı ilə “ümidsiz sionistlərin ruhunu qaldırmağa” çalışıb.

İdmançılarla görüşdə Xameneyi bildirib ki, Tramp “İran barədə axmaq davranış və yalanlarla güclü görünməyə çalışır”.

“Əgər Tramp həqiqətən güclüdürsə, qoy ABŞ-ın bütün ştatlarında ona qarşı etiraz edən milyonlarla amerikalını sakitləşdirsin”,  - o əlavə edib.

Xameneyi həmçinin Trampın ABŞ zərbələrinin İranın nüvə sənayesini məhv etdiyi barədə iddiasını rədd edib.

 “ABŞ prezidenti qürurla deyir ki, onlar İranın nüvə sənayesini bombalayıb məhv ediblər. Yaxşı, xəyal qurmağa davam etsinlər”,  -  Xamnei deyib.

Oktyabrın 9-da Tramp bəyan edib ki, ABŞ-ın  iyunun 13-də İsrailin İrana qarşı əməliyyatından sonra başladığı zərbələr olmasaydı, Tehran artıq nüvə silahına sahib ola bilərdi.

ABŞ Fordo, Natanz və İsfahandakı obyektlərə zərbə endirib.

İyunun 24-də atəşkəs qüvvəyə minib.

N.Təbrizli