İspaniyada qatar qəzasında 10 nəfər ölüb, onlarla insan yaralanıb

İspaniyanın cənubunda baş verən ağır dəmir yolu qəzası nəticəsində azı 10 nəfər həlak olub, onlarla sərnişin xəsarət alıb. Bu barədə fövqəladə hallar xidmətləri məlumat verib.

Məlumata görə, Kordoba əyalətində iki sürətli sərnişin qatarı relsdən çıxıb. Təxminən 100 nəfər müxtəlif dərəcəli xəsarətlər alıb, azı 25 yaralının vəziyyəti ağır qiymətləndirilir. Zərərçəkənlər Kordoba və ətraf bölgələrdəki xəstəxanalara, o cümlədən tibbi helikopterlərlə çatdırılıb.

İlkin məlumata əsasən, qatarların birinin relsdən çıxmasından sonra eyni sahə ilə hərəkət edən digər qatarla toqquşma baş verib. Hadisə nəticəsində dəmir yolu infrastrukturu ciddi zədələnib və bu istiqamətdə hərəkət tam dayandırılıb.

İspaniya hakimiyyəti qəza ilə bağlı rəsmi istintaqa başlayıb. Hökumət prioritetin zərərçəkənlərə yardım göstərilməsi və təhlükəsiz dəmir yolu əlaqəsinin bərpası olduğunu bildirib.

N.Təbrizli