İran prezidenti Amerika xalqına məktub ünvanlayıb

İran prezidenti Məsud Pezeşkian ABŞ ictimaiyyətinə məktub ünvanlayıb.

Məktubda Pezeşkian ABŞ vətəndaşlarını İranın siyasəti ilə bağlı stereotipləri yenidən nəzərdən keçirməyə çağırıb və bildirib ki, Tehran və Vaşinqton arasında münasibətlər müasir geosiyasətdə “ən çox yanlış başa düşülən” münasibətlərdən biri olaraq qalır.

O qeyd edib ki, İran müasir tarixində genişlənmə, müstəmləkəçilik və ya hökmranlıq siyasəti yürütməyib və müharibələrə başlamayıb.

Prezidentin sözlərinə görə, danışıqlar dövrlərində ABŞ iki dəfə İslam Respublikasına qarşı əsassız hərbi əməliyyatlar həyata keçirib.

Pezeşkian əlavə edib ki, xarici təzyiq və sanksiyalara baxmayaraq, İran dayanıqlığını qoruyub və əsas sahələrdə gücünü artırıb.

O, amerikalıları ənənəvi siyasi ritorikadan kənara çıxmağa və qarşıdurma əvəzinə qarşılıqlı hörmətə əsaslanan münasibətlər qurmağa çağırıb. Pezeşkian vurğulayıb ki, dialoq və keçmişin düzgün anlaşılması mövcud gərginliyin azaldılması üçün vacibdir.