Qırğızıstanda terror aktları hazırlamaqda şübhəli bilinən 31 nəfər saxlanılıb

Qırğızıstanın xüsusi xidmət orqanları terror aktlarının hazırlanmasında şübhəli bilinən 31 nəfərin saxlanılması ilə nəticələnən genişmiqyaslı antiterror əməliyyatı keçirib.Bu barədə Qırğızıstanın Dövlət Milli Təhlükəsizlik Komitəsi (DMTK) məlumat yayıb.

Məlumata görə, saxlanılan şəxslər beynəlxalq terror təşkilatları olan "Kətibə ət-Tövhid vəl-Cihad" və "İslam Dövləti" ilə əlaqədə şübhəli bilinirlər. DMTK onların hüquq-mühafizə orqanlarının əməkdaşlarına və din xadimlərinə qarşı terror aktları planlaşdırdıqlarını iddia edir.

Komitənin bildirdiyinə görə, əməliyyat zamanı Oş vilayətində 11, Batken vilayətində isə 20 nəfər saxlanılıb.

Oş şəhərində, Qara-Su rayonunda, Qızıl-Qiya şəhərində və Üç-Qurqan kəndində keçirilən tədbirlər zamanı antiterror əməliyyatı rejimi tətbiq olunub. Əməliyyata Daxili İşlər Nazirliyi, Sərhəd Xidməti, Müdafiə Nazirliyi, Fövqəladə Hallar Nazirliyi, Səhiyyə Nazirliyi və yerli icra hakimiyyəti orqanlarının nümayəndələri cəlb edilib.

DMTK-nın məlumatına əsasən, axtarışlar zamanı dini-ekstremist məzmunlu ədəbiyyat və elektron materiallar, qeydiyyatsız dörd odlu silah, terror təşkilatlarının simvolları, həmçinin fəaliyyətin maliyyələşdirilməsi üçün istifadə edildiyi ehtimal olunan pul vəsaitləri aşkarlanaraq götürülüb.

Əməliyyata DMTK sədri Cumqalbek Şabdanbekov rəhbərlik edib. Qurum bildirib ki, istintaq saxlanılanların mümkün əlaqələrini və maliyyələşdirmə mənbələrini araşdırmağı davam etdirir.