Ukrayna Rusiya ərazisində Omsk NEZ-in vurulduğunu bildirib

Ukrayna Silahlı Qüvvələrinin Baş Qərargahı Rusiyanın Omsk şəhərində yerləşən neft emalı zavoduna zərbə endirildiyini bildirib. Omsk vilayətinin qubernatoru Vitali Xotsenko da pilotsuz uçuş aparatlarının hücumunu təsdiqləyib və ilkin məlumata görə, ölən və ya xəsarət alan olmadığını açıqlayıb.

Ukrayna Baş Qərargahının məlumatına əsasən, hücum Ukrayna Silahlı Qüvvələrinin Xüsusi Əməliyyat Qüvvələri tərəfindən həyata keçirilib. Bildirilib ki, hədəf Ukrayna sərhədindən təxminən 2 500 km məsafədə yerləşən Omsk neft emalı zavodu olub.

Baş Qərargah zərbədən sonra zavod ərazisində yanğın baş verdiyini, dəymiş ziyanın həcminin isə dəqiqləşdirildiyini bildirib. Məlumata görə, ilkin olaraq illik emal gücü 8,4 milyon ton olan ELOU-AVT-11 neft emalı qurğusunun vurulduğu ehtimal edilir. 

Omsk vilayətinin qubernatoru Vitali Xotsenko isə "Telegram" hesabında Ukraynaya məxsus pilotsuz uçuş aparatlarının şəhərin şimal sənaye zonasına hücum etdiyini bildirib. O, hücum nəticəsində ölən və ya xəsarət alan olmadığını qeyd edib.