Kubada elektrik şəbəkəsi çöküb, 10 milyona yaxın sakin işıqsız qalıb

Kubanın milli elektrik şəbəkəsi bazar ertəsi günorta saatlarında çöküb və ölkənin təxminən 10 milyon sakini işıqsız qalıb. Bu barədə ölkənin elektrik şəbəkəsi operatoru UNE məlumat yayıb.

Operator hadisənin səbəblərinin araşdırıldığını və qəzanın başvermə səbəbinin hələ müəyyən edilmədiyini bildirib.

Kuba son aylarda köhnəlmiş enerji infrastrukturu və adaya yanacaq tədarükünü məhdudlaşdıran ABŞ-ın tətbiq etdiyi blokada fonunda uzunmüddətli elektrik kəsintiləri ilə üzləşir.

Uzun sürən iqtisadi böhran şəraitində elektrik enerjisinin təminatında davamlı problemlər yaşayan ölkədə vəziyyət ABŞ administrasiyasının təzyiqlərinin artması fonunda daha da ağırlaşıb.