İsrail Şərqi Qüdsdəki Britaniya konsulluğunu bağlayacaq

İsrail Böyük Britaniyanın İordan çayının qərb sahilindəki İsrail yaşayış məskənlərinə qarşı tətbiq etdiyi sanksiyalara cavab olaraq Şərqi Qüdsdəki Britaniya konsulluğunu bağlayacaq.Bunu İsrailin xarici işlər naziri Gideon Saar açıqlayıb.

Saar bildirib ki, Britaniyanın ABŞ-ın Qəzza üzrə koordinasiya missiyasında iştirakına da son qoyulacaq. Bundan əlavə, Britaniya hərbçilərinin Ramallahda Fələstin Milli Administrasiyasının təhlükəsizlik qüvvələrinə təlim keçməsi dayandırılacaq.

İsrail həmçinin 12 seçilmiş Britaniya nümayəndəsinin və digər bəzi Britaniya vətəndaşlarının ölkəyə girişini qadağan edəcək.

Saar Böyük Britaniyanın tətbiq etdiyi tədbirləri İsrailin daxili işlərinə müdaxilə kimi qiymətləndirib və bildirib ki, Londonun və analoji addımlar atan digər ölkələrin mövqeyi İsrail-Fələstin münaqişəsinin həlli perspektivlərini daha da uzaqlaşdırır.

Böyük Britaniyanın xarici işlər naziri Ed Milibend daha əvvəl İordan çayının qərb sahilindəki İsrail yaşayış məskənlərinə qarşı yeni tədbirlər elan edib. London həmin yaşayış məskənlərində istehsal olunan malların idxalını, tikinti və maliyyələşdirmə də daxil olmaqla bir sıra xidmətlərin göstərilməsini, eləcə də ərazidəki daşınmaz əmlakın reklamını qadağan etməyi planlaşdırır.