ABŞ Kubaya yanacaq daşıyan gəmini saxlayıb

ABŞ Sahil Mühafizəsi Karib dənizində Kubaya yanacaq daşıdığı bildirilən “Grace” yük gəmisini saxlayıb.Bu barədə “The New York Times” ABŞ Sahil Mühafizəsinin bəyanatına istinadən məlumat yayıb.

Məlumata görə, uzunluğu təxminən 91 metr olan gəmi sentyabrın 5-də Kuba ilə Meksika arasındakı sularda saxlanılıb. Sahil Mühafizəsi “Grace” gəmisinin “kölgə donanması” taktikasından istifadə etdiyindən şübhələnildiyini bildirib.

Qurum gəminin hansı konkret hərəkətlərinə görə şübhəli bilindiyini açıqlamayıb. “The New York Times” yazır ki, bu taktikalara gəminin transponderlərini söndürməsi və yerləşdiyi mövqeyə dair məlumatların ötürülməsini dayandırması daxil ola bilər.

Sahil Mühafizəsi bildirib ki, ABŞ tərəfi bu ilin yayında Kubaya yanacaq daşıdığı iddia edilən “Jaira Provider” gəmisini də ələ keçirib. Gəmidə təxminən 210 min qallon yanacaq olduğu bildirilib.

“Grace” gəmisindəki yanacağın həcmi açıqlanmayıb. Sahil Mühafizəsinin nümayəndələri kəşfiyyat məlumatlarına əsasən yükün Kuba üçün nəzərdə tutulduğunun necə müəyyənləşdirildiyini də açıqlamayıblar.

Qəzetin məlumatına görə, Kuba yanacağa olan tələbatının bir hissəsini daxili istehsal hesabına ödəsə də, enerji sisteminin fəaliyyətini təmin etmək üçün idxaldan asılıdır. Yanacaq çatışmazlığı ölkədə genişmiqyaslı elektrik enerjisi kəsintilərinə, həmçinin xəstəxanalar, ərzaq və su təchizatı ilə bağlı problemlərə səbəb olub.