Ermənistan parlamentinin spikeri Azərbaycandan keçən əsgərdən danışıb

Ermənistan Milli Məclisinin spikeri Ruben Rubinyan Azərbaycan hərbçisi Nəsimi Musayevin mümkün ekstradisiyası məsələsinin hazırda müzakirə edilməsini tez hesab edir.

O bildirib ki, hazırda belə bir proses yoxdur və Musayev Ermənistanda irəli sürülən ittihamlarla bağlı həbsdədir.

“Hazırda başqa bir proses yoxdur və müxalifətin bu açıqlamaları yenə də heç nəyə qarşı mübarizədir, çünki əslində mübarizə apardıqları heç nə yoxdur, həmin mövzu mövcud deyil. Gələcəkdə, vaxtı gələndə biz bunu müzakirə edəcəyik, mən indi qaldırdığınız məsələni müzakirə etmək üçün uyğun vaxt hesab etmirəm”, - Rubinyan jurnalistlərə bildirib.

Ermənistan parlamentinin spikeri Azərbaycan hərbçisinin ölkə ərazisinə necə keçdiyinin də hələ müəyyənləşdirilməli olduğunu deyib. Onun sözlərinə görə, bunun hərbi hissəni özbaşına tərk etmə, yoxsa yolu azma nəticəsində baş verdiyi araşdırılmalıdır. Rubinyan bunun diversiya olmadığını düşündüyünü də bildirib və əsas kimi Azərbaycan tərəfinin hərbçinin itkin düşməsi barədə Ermənistanı əvvəlcədən məlumatlandırmasını göstərib.

Azərbaycan Baş Prokurorluğu oktyabrın 1-də Nəsimi Musayevin sentyabrın 26-da xidmət yerində olmaması və yerinin müəyyən edilməməsi ilə bağlı axtarışa verildiyini açıqlayıb. Araşdırma zamanı onun hərbi hissəni özbaşına tərk etməsinə əsaslı şübhələr müəyyən edilib və cinayət işi başlanıb. Daha sonra Musayevin Ermənistan ərazisində olduğu və həmin ölkənin aidiyyəti orqanları tərəfindən saxlanıldığı müəyyənləşdirilib. Azərbaycan qurumlarının Ermənistan tərəfi ilə təmasları davam etdirilir.

Ermənistan tərəfinin məlumatına görə, Musayev oktyabrın 1-də Sünik vilayətinin Şaki kəndində yaşayış evinə daxil olaraq atəş açıb və nəticədə bir qadın yaralanıb. Ermənistan hüquq-mühafizə orqanları onun barəsində bir neçə maddə üzrə cinayət işi başlayıb və həbs qətimkan tədbiri seçilib. Bu məlumatlar Ermənistan tərəfinin açıqlamalarına əsaslanır.

Gülnar Nazimqızı