ABŞ Oman körfəzində yük gəmisinə zərbə endirib

ABŞ hərbçiləri Oman körfəzində İrana qarşı dəniz blokadasını yarmağa cəhd edən kommersiya gəmisini sıradan çıxarıblar.Bu barədə ABŞ Silahlı Qüvvələrinin Mərkəzi Komandanlığı (CENTCOM) "X" sosial şəbəkəsində məlumat yayıb.

CENTCOM-un məlumatına görə, ABŞ hərbi təyyarəsi Panama bayrağı altında üzən "M/V Ocean Molica" ("Arika Sun" kimi də tanınır) yük gəmisinin arxa hissəsinə yüksək dəqiqlikli sursatla zərbə endirib. Nəticədə gəminin hərəkət sistemi sıradan çıxıb, ekipaj üzvləri xəsarət almayıblar.

Bildirilib ki, gəmi İran limanından çıxdıqdan sonra regional sulardan keçməyə cəhd edib.

Komandanlığın məlumatına əsasən, ABŞ qüvvələri iyulun 14-də İrana qarşı dəniz blokadasını bərpa etdikdən sonra dörd kommersiya gəmisini sıradan çıxarıb, 135 gəmini isə geri dönməyə məcbur edib. Bundan əlavə, həmin dövrdə İran İslam İnqilabı Keşikçiləri Korpusu ilə əlaqəli olduğu bildirilən 10 tankerin məhv edildiyi qeyd olunub.