Rusiyada çaya düşən avtomobildə beş nəfərin meyiti tapılıb

Rusiyanın Çuvaşiya Respublikasının Novoçeboksarsk şəhərində avtomobilin Sivil çayına düşməsi nəticəsində beş nəfər ölüb.

Bu barədə Rusiya İstintaq Komitəsinin regional idarəsinin mətbuat xidməti məlumat yayıb.

Bildirilib ki, hadisə yerinə baxış zamanı daha iki nəfərin meyiti aşkarlanıb və Fövqəladə Hallar Nazirliyinin xilasediciləri tərəfindən sudan çıxarılıb. Həlak olan beş nəfərin hamısının şəxsiyyəti müəyyənləşdirilib.

İstintaqın məlumatına görə, noyabrın 6-sı axşam saatlarında içərisində üç kişi və iki qadının olduğu avtomobil Sivil çayına düşüb.

Çuvaşiya prokurorluğunun məlumatına görə, bir qrup yerli sakin avtomobillə hərəkət etdikdən sonra onlarla əlaqə kəsilib. Yaxınları onların itkin düşməsi barədə polisə müraciət ediblər.

Hadisə yerində çay sahilindəki uçuruma doğru gedən avtomobil izləri aşkarlanıb.

Faktla bağlı ehtiyatsızlıqdan iki və ya daha çox şəxsin ölümünə səbəb olma maddəsi ilə cinayət işi başlanıb.

Hazırda müstəntiqlər hadisə yerində araşdırmanı davam etdirir, şahidlər dindirilir və məhkəmə-tibbi ekspertizalar aparılır.